最近一年，我正式踏入德州撲克嘅世界。每次坐低牌桌，無論係朋友間嘅 live poker定線上嘅比賽，都令我感受到一種獨特嘅享受。作為參賽者，我學識點樣下注、計pot odds；作為搞手，我要確保牌局公平、氣氛良好。呢一年嘅經歷，好似將人生壓縮喺一張張牌同一次次決定入面。
輸贏之間，唔單止係金錢，更係對自己決斷力同心理承受力嘅考驗。德撲令我明白，真正嘅挑戰，往往唔係牌好唔好，而係你敢唔敢、肯唔肯喺關鍵一刻作出玩家承受得起既 all-in。
所謂嬴輸成敗，就在關鍵一舖 By Gary （原話是：賭錢就係賭一舖㗎咋）
德州撲克最核心嘅概念之一，就係計算 Expected Value（EV），即預期價值。有云：德州撲克是數學遊戲，精通心算者往往就能成為水上人。透過數學計算，你可以估計自己嘅勝率：例如手持AK對手可能範圍，結合讀牌（reading）、數out（outs）同pot odds，得出一個清晰嘅EV正負值。假如EV正數，長期嚟講就應該push；負數就應該fold。
呢個過程好理性，好似人生中做重大決定前，會權衡風險回報、概率同後果。一個有技術嘅玩家，唔難透過分析得出「呢手牌應該點打」。但即使計算再精準，牌局最終仍然有隨機性。EV只係長期平均，唔代表每一次都一定贏。
即使勝率高達百分之九十九，仍然有百分之一嘅機會輸。bad beat、cooler、suck-out，呢啲情況喺poker桌上一樣會發生。當你all-in嗰一刻，明明係大熱門，點知river一張奇蹟牌，就將你嘅籌碼全部清走。呢種「有可能發生」嘅事，無論概率幾低，都真係會出現。人生又何嘗唔係？再完美嘅計劃、再高嘅成功率，都冇必然勝利。
無論係事業、感情定人生重大抉擇，只要涉及風險，就要有心理準備接受最壞嘅結局。冇準備好承受失敗嘅人，永遠唔應該輕易all-in，因為一旦hit到嗰個1%，後果可能係毀滅性。
正正因為如此，如果冇呢種「有可能輸晒」嘅心理準備，就千祈唔好喺人生中作出「如廝決定」嘅all-in式選擇。呢啲決定好似poker中嘅大pot all-in：一旦輸，就可能輸晒本錢、輸晒時間、甚至輸晒未來。
感情上衝動結婚、事業上孤注一擲借錢創業、或者喺人生低谷時作出極端選擇——呢啲都係高風險嘅all-in。如果心態未夠堅韌，輸嗰一刻好易崩潰，甚至一蹶不振。德撲教曉我，真正成熟嘅玩家，唔係永遠贏，而係識得喺輸得起嘅時候先去冒險。人生亦然：只有準備好承受最壞結果，先有資格去追求最大嘅可能。
配合這條原則底線，加上本人的座右銘「Pray for the best，Prepare for the worst」，感覺會令我的命理推算 Career 更上一層樓。特此撰文一篇。