近年嚟，我多咗一個新愛好，就係參與德州撲克（Texas Hold’em）。起初只係覺得有趣，偶然有朋友搞局我參與左兩三次，點知一玩就上癮。一年多嚟，無論係線上平台定係朋友間小賭怡情，我都投入咗唔少時間同心機。德撲唔單止考技術，更考耐性、觀察力同心理質素。
每次坐低，牌局開始嗰一刻，就好似人生重新開一局新遊戲。
輸贏之間，有時真係會令人反思好多人生道理。作為命術從業者，呢個興趣唔單止畀我放鬆，更令我對自己嘅決定同情緒管理，有更深一層嘅體會。
德州撲克基本規則其實唔複雜：每人先派兩張底牌（hole cards），之後桌面會逐步開五張公牌（community cards），玩家用自己兩張加公牌湊出最好嘅五張牌組合。過程中要經過多輪下注，包括pre-flop、flop、turn同river，每一輪都係自己決定fold、call、raise定all-in。呢啲決定完全掌握喺自己手上，正正同人生好相似——好多關鍵時刻，路向邊走、幾多風險，都係自己一手揀。雖然有運氣成份，但最終成敗，大部分仍然取決於你點樣應對眼前嘅牌局同局面。
投資界有令人聞之生畏的黑天鵝及灰犀牛，撲克界亦有令人含恨嘅「bad beat」。就係明明你手持極強牌，例如AA對KK，勝率高達八成以上，點知對手喺river奇蹟式中咗set或者straight，硬生生將你淘汰。呢種「撻Q」情況，無論技術幾高，都避唔開。人生又何嘗唔係咁？即使你計劃周詳、準備充分，仍然有時會遇上極低概率嘅倒霉事。運氣高低起伏，好似牌桌上一時上風一時下風。即使有百分之九十八勝率，都可能輸嗰百分之二嘅災難一擊。呢啲經歷教識我，技術同心態固然重要，但接受運氣嘅存在，同埋學會喺逆境中唔崩潰，先係真正嘅成長。
命理學嘅價值，在於窺探人生中嘅禍福時機，教人趨吉避凶、順勢而為。
放到poker世界理解，就好似要學識把握自己嘅「upswing」上風期，積極進取、多打價值；同時識得喺「downswing」下風期收斂，減少無謂損失，保住本錢等機會再嚟。縱使你識得讀牌、識得計pot odds、識得避開壞運，但人生同牌局一樣，始終有高低起伏、喜悲交織。無論贏大錢定輸到想喊，每段經歷都係屬於自己嘅一課。最終，真正決定你走多遠嘅，唔單止係牌好唔好，而係你點樣面對每一手牌、每一場人生風浪。